Act 3 | IAN | STEP | Man kavle yilaa lɨga nyan tɨndɨ. Nyɨme kwutɨ mala man kavle yilaa lɨndɨ. Nandinya nandinya ndɨ kat kwutaa mɨna yiga Godna ngay ndaamangemba taagalɨndi. Wan ndaamange ndɨna so lɨgandɨ. Apmana waa wandi. Wungi ndaamangemba lɨga yalɨga nɨmba kat sanyakat yawilɨndɨ.

Acts 3

MAN KAVLE YILAA LƗGA NYAN KAT KWUNAPMBƗK

1 Man kavle yilaa lɨga nyan tɨndɨ. Nyɨme kwutɨ mala man kavle yilaa lɨndɨ. Nandinya nandinya ndɨ kat kwutaa mɨna yiga Godna ngay ndaamangemba taagalɨndi. Wan ndaamange ndɨna so lɨgandɨ. Apmana waa wandi. Wungi ndaamangemba lɨga yalɨga nɨmba kat sanyakat yawilɨndɨ. 3 Kawilɨmbɨt maa yawi la nyan pitagwi Jon kat vɨlaa sanya kat yawindɨ. 4 Pitagwi Jono ndɨ kat vɨga wambɨt. Angat avɨ wambɨt. 5 Wambɨt maa mbɨk kat vɨga yelavɨtndɨ. Wun kat nɨma sanya kwigiyambɨt waa yelavɨtndɨ. 6 Pita ndɨ kat wandɨ. Wun sanya kai. Mandɨp ndamba kwigiyowun. Laataa alɨ mɨla wowun waa wandɨ Pita. 7 Pita walaga ndɨna yaagindan taambamba kwutaa katsondɨ. Katsondɨ maa ndɨna man tagula ngendɨ. 8 Kwiyatapman laataa man veindɨ. Mbɨtnonala Godna ngay wuleindɨ. Veiga pulaka wandɨ. God mɨn nɨma nyan mɨn waa Godna ngay wuleindɨ. 9 Veiga pulaka wanda vat nɨma sakwat nɨmba vɨndi. 10 Ndɨ kat vɨga yelavɨtndi. An nyan ndaamangemba kwutaa kalindi, ndalɨndɨ. Ndɨ kat vɨga ngɨpaliga ndandi.

GODNA NGAY WULEILAA PITA NYAANGƗT MBUTNDƗ

11 Pitaagwi Jon kat mbɨk kat kwagala vak kat kai walaa kwutaa lɨndɨ. Nat nɨma sakwat nɨmba pɨlɨga yaga yisolaa lɨndi wan kavamba. Godna ngayna nat waambu Solomona waambumba yisolaa lɨndi. Yisolaa lɨga yelavɨtndi. Kan mandana waa yelavɨtndi. 12 Ndinyangu yandi, Pita ndi kat vɨlaa wandɨ. Ngwuk Isrel ngwuk. Manda kat ngɨpaliga ndangwuk. Ngwuk angat vɨlɨgangwuk. Ana maawupmba ana wali ndɨ kat laataa vei waa. Ana kwondumba ana wali laataa vei waa. 13 Jisasna kwondumba wali maa laataa veindɨ. Tamba Ebraham, Aisak, Jekop God kat yelavɨtndi. Mbambala God Jisasna sɨ kwusondɨ. Ngwuk Jisas kwutaa kwingwuk mala Pailat kat Jisas kat ke kwagalaga. Barabas kat kwagalagiyamɨn waa wangwuk. Barabas nat nɨmba kat sɨlaa nyana. 15 Ngwuk apma vat yetɨlɨnja vat kwilɨga nyan kat vatnyangwuk. God wandɨ, laatndɨ. Nɨna mbaapma nɨmba vɨga lɨnɨn. 16 Jisasna kwondumba wan nyan kat an kwunakna. An nyan kwunatiya nyan Jisas kat ndɨna mbangɨ wiyo waavi taagandɨ. Wungi kat tɨga kwo lɨgandɨ. Ngwuk vɨga lɨgangwuk wan nyan kat. Jisas kat ndɨna mbangɨ wiyo waavi taagandɨ maa kwo lɨnda vak kat vɨga lɨgangwuk.

17 Yakwa nɨmba Jisas kat vatnyangwa njɨmblambla Jisas God waa nyan tɨnda vat ana vɨngwuk. Ngwula njambwi nɨmba ndino ana vɨga lɨndi. Vɨlɨgowun. 18 Kraist God waa nyan kiyagiyandɨ. Nat nɨma sakwat njɨvwa kwukiyandɨ waa tamba pɨlɨwutndi profet. God wandɨ maa pɨlɨwutndi. Pɨlɨwutnja nyaangɨtmba God wandɨ, Kraist njɨvwa kwutndɨ.

19 Wungi kat tɨga kupi maawut yelavɨk. God ngwutna kavle vat lɨmbwilaa ngwuk kat kwunaka apma vat yigiyandɨ. Ngwutnanala lɨga ngwuk kat kwunaka apma vat yigiyandɨ. 20 Ngɨni God wandɨ, ndɨnai waa nyan Jisas ngwuk kat ngaga yaigandɨ. 21 God mbambala nyɨnangwupmba lɨga kawiga lɨgandɨ. Tamba Godna profetna maawut Godna waagan ngwandɨndɨ maa profet wandi. Wanja nyaangɨt tɨndi mala God ngaga yaigandɨ.

22 Moses kupma wandɨ. Ngwutna kɨta nyan God wun kat waa vak vla ndɨ kat waigandɨ. Ngwuk kat mbutndeya nyaangɨt wuka kwutaa lɨgiyangwuk waa wandɨ Moses. 23 Kɨta nyan ndɨnai waa nyaangɨt wutapman yindeyan ndɨ kat God sɨgiyandɨ. Godna nat nɨmbagwinala ana yetɨgiyandɨ. God ndɨ kat savɨlugiyandɨ waa wandɨ Moses. 24 Tamba nat profet Samyuel kan nyaangɨt pɨlɨwutndɨ. Ndɨna kwupmba la profet nɨmbun kan nyaangɨt tɨgiyaa njɨmbla kat pɨlɨwutndɨ. 25 Ngwutna walanga Ebraham kat God wandɨ. Mɨna yelangɨna kɨta nyan ngepma ngepmamba lɨgiyaa nɨmba kat kwunakiyandɨ waa wandɨ God. Ngwuk tamba la profetna walanga. Wungi kat tɨga wan apma vat ngwutno klaigangwuk yandɨ. God wandɨ, Jisas yalaa ngwuk kat kwunapmat tɨgandɨ. Ngwuk kat kwunatndɨ maa kavle vak yilɨngwa vak kwagalagiyangwuk.